წერილი რუსეთის ფედერაციის პრეზიდენტს

მოგესალმებით ბატონო ვლადიმერ,

ჩვენ წარმოვადგენთ ახალ, ერთადერთ დამოუკიდებელ პოლიტიკურ პარტიას საქართველოში.

ჩვენ გვინდა მშვიდობა და კეთილი ურთიერთობა ყველასთან და გვურს, რომ დასრულდეს ჩვენს შორის პოლიტიკური გაუგებრობები. ამასთან დაკავშირებით, უკვე მივმართეთ წერილით აფხაზეთსა და სამხრეთ ოსეთს (ასლი ერთვის აღნიშნულ წერილს), რათა თუნდაც პატარა ნაბიჯებით დავიწყოთ არც თუ მარტივი გზა დიდი მიზნისკენ -  ჩვენს ხალხებს შორის ურთიერთობის დალაგებისკენ.

ამერიკული კომპანია „IRI“-ის მიერ ჩატარდა კვლევა (2020 წ.), რომლის მიხედვითაც საქართველოს მოსახლეობის 70%-ზე მეტი ემხრობა რუსეთთან დიალოგის გაგრძელებას. თუმცა, ამავე დროს, 80% ეთანხმება ნატოში გაწევრიანებას, რადგან რუსეთი ჩვენი ქვეყნის  მტრად მიაჩნიათ.

ჩვენი აზრით, აღნიშნული კვლევა გვაძლევს იმის იმედს, რომ შესაძლებელია ოქროს შუალედის პოვნა. ვფიქრობთ, რომ ამისთვის პირველი ნაბიჯი თქვენი მხრიდან უნდა გადაიდგას, რადგან რეალურად, მთავარი ბერკეტი თქვენს ხელშია.

ჩვენ გთავაზობთ მოლაპარაკებას, აფხაზეთსა და სამხრეთ ოსეთთან საზღვრების 48 საათით გახსნას თავისუფალი მოძრაობის პრინციპით. ამით, ადამიანებს საზღვრის ორივე მხრიდან შეეძლებათ შეხვედრა, სუფრის გაშლა და თითო ჭიქა ღვინის მირთმევა.  ეს გადაწყვეტილება იქნება ჰუმანური, დიპლომატიური და ყველა მხარისთვის სასარგებლო სამომავლო ურთიერთობაში.

მე წავიკითხე მცირე ბიოგრაფია თქვენს შესახებ და ვიცი, რომ თქვენ ბავშვობა გაატარეთ 20 კვადრატული მეტრის სახლში და გქონდათ არც თუ მარტივი ცხოვრება. არც მე მქონდა დალხენილი ცხოვრება - მე და მამა, წლების განმავლობაში, ოჯახს თბილისის ნაგავსაყრელზე სიარულით ვარჩენდით. მე ამით იმის თქმა მინდა, რომ არ ვფიქრობ (არ მგონია იყოს შესაძლებელი), რომ ადამიანი ჩვენნაირი ცხოვრებისეული გამოცდილებით იყოს უგულო ან უნდოდეს ომი და უბედურება ხალხისთვის.

დიდი იმედი გვაქვს ურთიერთგაგების და მოგმართავთ თხოვნით, დაგვეხმაროთ აღნიშნული საკითხის მოგვარებაში, რათა დაიძრას ჩვენს მოძმე ხალხთან ურთიერთობების დარეგულირების პროცესი.

ამ წერილის მიზანია, დავადგინოთ მოგვარებადია თუ არა ჩვენს შორის ურთიერთობა მეგობრული დამოკიდებულებით. ამას გწერთ არა როგორც პოლიტიკური პარტია, არამედ როგორც საქართველოს რიგითი  მოქალაქე, რომელსაც უნდა ყველასთან მშვიდობიანი, მეგობრული და დალაგებული ურთიერთობა ჰქონდეს.

მადლობა ყურადღებისთვის,

მოქალაქეთა პოლიტიკური გაერთიანება (პოლიტიკური პარტია) „შეცვალე საქართველოს“ თავმჯდომარე

გიორგი გაგნიძე